Thursday, 18 May 2017

கிராம நிர்வாக அலுவலர் தேர்வு இரண்டாம் கட்ட கலந்தாய்வு அறிவிப்பு வெளியீடு.

கிராம நிர்வாக அலுவலர் தேர்வு இரண்டாம் கட்ட கலந்தாய்வு  அறிவிப்பு  வெளியீடு | இது குறித்து தமிழ்நாடு அரசுப் பணியாளர் தேர்வாணையம் வெளியிடப்பட்ட செய்திக்குறிப்பில் கூறியிருப்பதாவது: கிராம நிர்வாக அலுவலர் 2014-2015 பதவிக்கு நேரடி நியமனம் செய்யும் பொருட்டு தமிழ்நாடு அரசுப் பணியாளர் தேர்வாணையத்தின் அறிவிக்கை எண்.19/2015, நாள்.12.11.2015 வாயிலாக விண்ணப்பங்களைக் கோரியிருந்தது. இப்பதவிக்கான எழுத்துத் தேர்வு கடந்த 28.02.2016 அன்று நடைபெற்றது. மேற்படி எழுத்துத் தேர்வில் பங்கேற்ற விண்ணப்பதாரர்களின் மதிப்பெண்கள், தரவரிசை விவரம் 01.07.2016 அன்று தேர்வாணைய இணையதளத்தில் வெளியிடப்பட்டது.இத்தெரிவில் நிரப்பப்படாமல் உள்ள 147 காலிப்பணியிடங்களை நிரப்ப இரண்டாம் கட்ட சான்றிதழ் சரிபார்ப்பு 13.03.2017 முதல் 15.03.2017 வரை நடைபெற்றது. இத்தெரிவிற்கான இரண்டாம் கட்ட கலந்தாய்வு சென்னை-3, பிரேசர் பாலச்சாலையில் (பிராட்வே பேருந்து நிலையம் மற்றும் கோட்டை ரயில் நிலையம் அருகில்) உள்ள தேர்வாணைய அலுவலகத்தில் 19.05..2017 முற்பகல் அன்று நடைபெறும். இரண்டாம் கட்ட கலந்தாய்விற்கு அழைக்கப்படும் விண்ணப்பதாரர்களின் பதிவெண் பட்டியல், தரவரிசை அடங்கிய கால அட்டவணை பட்டியல் தேர்வாணைய இணையதளத்தில் வெளியிடப்பட்டுள்ளது. இரண்டாம் கட்ட கலந்தாய்விற்கு அழைக்கப்பட்ட விண்ணப்பதாரர்களுக்கு தேதி, நேரம் குறிப்பிடப்பட்ட அழைப்பாணை விரைவஞ்சல் மூலம் தனியாக அனுப்பப்பட்டுள்ளது. இந்த அழைப்பாணையினை தேர்வாணைய இணையதளத்திலிருந்தும் (www.tnpsc.gov.in) பதிவிறக்கம் செய்து கொள்ளலாம். மேலும் இவ்விவரங்கள் குறுஞ்செய்தி மற்றும் மின்னஞ்சல் வாயிலாகவும் விண்ணப்பதாரர்களுக்கு தெரிவிக்கப்பட்டுள்ளது. எனவே, நடைபெற உள்ள இரண்டாம் கட்ட கலந்தாய்வில் கலந்து கொள்வதற்காக அழைக்கப்பட்ட விண்ணப்பதாரர்கள், அவர்கள் பெற்றுள்ள மதிப்பெண்கள், மொத்த தரவரிசை, விண்ணப்பத்தில் அளித்துள்ள தகவல்கள் அடிப்படையில் அழைக்கப்பட்டுள்ளனர். மேலும் இடஒதுக்கீடு விதியின்படியும், தரவரிசை மற்றும் குறிப்பிட்ட இடஒதுக்கீட்டு பிரிவில் உள்ள காலிப்பணியிடங்களின் நிலவரப்படி விண்ணப்பதாரர்கள் கலந்தாய்விற்கு அனுமதிக்கப்படுவர். இரண்டாம் கட்ட கலந்தாய்விற்கு அழைக்கப்பட்ட விண்ணப்பதாரர்கள் அட்டவணையில் குறிப்பிட்டுள்ள நாள்/நேரத்தில் தவறாமல் கலந்தாய்வில் கலந்து கொள்ள வேண்டும். விண்ணப்பதாரர்கள் இரண்டாம் கட்ட கலந்தாய்விற்கு குறிப்பிட்டுள்ள நாள்/நேரத்தில் வரத் தவறினால் அவர்களுக்கு மறுவாய்ப்பு அளிக்கப்படமாட்டாது எனவும் தெரிவிக்கப்படுகிறது. இவ்வாறு அந்த செய்திக்குறி்ப்பில்  குறிப்பிடப்பட்டுள்ளது.

No comments:

Post a Comment